BMW Group şirkəti, 5-ci və 7-ci seriya sedanların və X1 başlanğıc səviyyəli lüks SUV avtomobilin elektrikli versiyasını istehsal etdiyini elan etdi.
Bu deməkdir ki, Almaniyanın ən məşhur lüks avtomobil modellərin demək olar ki, hamısının elektrikli versiyaları olacaqdır. Ən populyar BMW avtomobili sayılan 3-cü seriyanın tam elektrikli versiyası, artıq sınaq kamuflyajında ABŞ-ın yollarında görüldü. Tezliklə satışa buraxılacaq BMW i4 avtomobili 4-cü seriya sırasına daxil olacaq. İyulun əvvəlində şirkət, çox satılan X3 SUV avtomobilinin tam elektrikli versiyası olacaq iX3 modeli haqqında elan etdi. BMW Group eyni zamanda daha kiçik X5 modelinə bənzər iNext SUV avtomobilini də təqdim etməyə hazırlaşır.
Əlbəttə ki, BMW təkcə elektrikli avtomobillər satmayacaq, benzin, orta-hibrid və plaqin-hibrid nəqliyyat vasitələri istehsalını da davam etdirəcəkdir. BMW Group həmçinin qeyd etdi ki, növbəti 10 il ərzində avtomobillərin CO2 emissiyanı ən azı 30% azaltmağı planlaşdırır. O vaxta qədər şirkət, yollarda 7 milyondan çox BMW Group tərəfindən istehsal edilən elektrikli nəqliyyat vasitəsinin olacağını və onların 4,6 milyonu tam elektrikli olacağını ehtimal edir. Qeyd edək ki, şirkət hazırda ildə təxminən 2,5 milyon avtomobil satır.
Bir çox köhnə avtomobil istehsalçıları kimi, BMW də Avropa və Çində ciddi emissiya qaydalarına uyğunlaşmağa çalışır. Avropanın bəzi şəhərlərində daxili yanma mühərriklərinin istifadəsinə tam qadağa qoyulub. Bir vaxtlar BMW Group şirkəti elektrikli avtomobillərin inkişafında qabaqcıllardan biri hesab olunurdu, lakin nəticədə daxili yanma mühərriklərinin istehsalını iki dəfə artırdı. O zamandan bəri, Alman avtomobil istehsalçısı bazar payını itirdi. Tesla şirkətinin böyüməsi alman şirkətinə birbaşa təsir edir, çünki İlon Maskla BMW şirkətinin hər ikisi eyni varlı alıcıları hədəf alır.
Mənbə: The Verge
